Rábade acollerá en agosto a segunda Concentración Motoclub Rábade Biker's
Rábade converterase os días 22 e 23 de agosto no punto de encontro dos afeccionados ao motociclismo coa celebración da segunda edición da Concentración Motoclub Rábade Biker's, un evento aberto a todos os públicos que reunirá rutas, exhibicións, música, gastronomía e actividades para todas as idades.
A concentración, organizada polo Motoclub Rábade Biker's coa colaboración dos concellos de Rábade, Friol e Cospeito, ademais da Deputación de Lugo e da Xunta de Galicia, contará tamén cunha zona de acampada cuberta con duchas dispoñible desde o venres para facilitar a estancia dos participantes.
A programación dará comezo o sábado 22 de agosto coa apertura e recollida de inscricións a partir das 9.30 horas. Ás 10.30 horas iniciarase unha excursión con parada no concello de Cospeito, onde os asistentes poderán gozar dun petisco. A sesión vermú celebrarase ás 13.00 horas e media hora despois ofrecerase unha pinchada para os inscritos.
Durante a tarde haberá colchonetas gratuítas para os máis pequenos e xogos populares, antes dunha exhibición de stunt a cargo de Balles & Pichu. Xa pola noite desenvolverase unha ruta en homenaxe aos motoristas falecidos, seguida da cea para os inscritos e dunha festa amenizada polo DJ Koki.
A actividade continuará o domingo 23 de agosto coa apertura das inscricións e unha nova saída en ruta, nesta ocasión con parada no Castro de Friol, onde tamén se ofrecerá un petisco aos participantes. A sesión vermú dará paso á comida de confraternidade para os inscritos, tras a que se celebrará o sorteo de agasallos e a entrega de trofeos, poñendo o punto final á concentración.
A organización estableceu unha inscrición completa de 50 euros, mentres que a modalidade individual terá un custo de 35 euros. As comidas estarán servidas polo Restaurante Paco.
Con esta segunda edición, o Motoclub Rábade Biker's busca consolidar unha cita que aspira a converterse nun referente para os amantes das dúas rodas na provincia de Lugo, combinando a paixón polo motociclismo cun amplo programa de lecer e convivencia pensado para participantes e acompañantes.