Rábade organiza unha excursión á Festa da Malla Tradicional de Lalín para descubrir unha das grandes celebracións etnográficas de Galicia
A programación do centenario de Rábade continúa sumando propostas para achegar á veciñanza ao patrimonio cultural galego. O Concello organiza o vindeiro 22 de agosto unha excursión á XXVII Festa da Malla Tradicional de Doade, en Lalín, declarada Festa de Interese Turístico de Galicia, unha das citas etnográficas máis destacadas do verán.
A viaxe ten un prezo de 30 euros e as inscricións poden formalizarse na Área de Cultura e Deporte do Concello. As persoas interesadas tamén poden solicitar información no teléfono 982 39 00 62 (extensión 1).
A excursión permitirá asistir á recreación dun dos traballos agrícolas máis tradicionais de Galicia. Durante a xornada realizaranse demostracións do proceso completo da malla, desde o carrexo dos mollos ata a malla á pedra, pasando polo uso da malladoira manual, da maquinaria a motor e do tractor, ademais da entrega do premio ao 'Mellor vestido de época'.
O programa da festa complétase cunha mostra de artesanía, exposición de pintura, gastronomía tradicional e actuacións de música en directo que converten a localidade de Codeseda nun auténtico museo vivo da cultura rural galega. A celebración, organizada arredor do Museo Etnográfico Casa do Patrón, reúne cada ano centos de visitantes e veciños para preservar e divulgar os antigos labores do campo.
Con esta iniciativa, o Concello de Rábade ofrece á veciñanza a oportunidade de coñecer de primeira man unha das festas máis representativas da tradición agrícola galega, nunha xornada pensada para combinar cultura, historia e convivencia.