Arrinca en Vilalba a Xira dentro do programa festivo

TerraChaXa
Hoxe darán comezo os tres días de Xira para os máis mozos.
IMG_20180817_122225
IMG_20180817_122225
24 ago 2018

Hoxe darán comezo os tres días de Xira para os máis mozos. Para eles, como novidade, haberá un concerto de rock vilalbés na propia área recreativa a mesma noite do inicio. Foron invitados a participar todos os grupos da localidade pero por diferentes circunstancias persoais só puideron participar uns cuantos. Así, a partir das 21.30 horas actuarán os rapeiros Chocolay e 27800 Mafia. Sobre as 23.00 horas será a vez dos grupos de rock con Conducto Coloquio e Black Vintage.

O sábado continuará a festa na Madalena comezando ás 14.00 horas coa sesión vermú amenizada polas orquestras Fin de Siglo e Essencia, as mesmas que se encargarán da verbena a partir das 22.30 horas.

Entre as dúas actuacións musicais haberá tempo para os deportes tradicionais cunha mostra interactiva de Xotramu sobre xogos tradicionais e o partido de fútbol do Rácing Vilalbés contra o Porriño ás 18.30 horas.

Tras o sábado, día de máxima festa, virá un domingo no que o cansazo espérase que faga o seu traballo e que deixe aos festeiros con menos ímpetu, razón pola que só haberá música en sesión vermú a partir das 14.15 horas e se prolongará ata media tarde para evitar a celebración da verbena.

A orquestra que se ocupará da música, América SL estará acompañada pola Charanga de Vilalba CDV.

Espérase novamente que a festa reúna a miles de mozos e mozas que todos os anos toman a área recreativa ao asento instalando carpas e cabañas onde pasar a noite e vivindo durante tres días ininterrompidos unha das celebracións máis tradicionais das festas de San Ramón.

A Xira para maiores celebrouse o pasado mércores.

NON AO SEXISMO

A Concelleira de Benestar Social, Familia, Muller e Emprego do Concello de Vilalba, Flor Rey Martínez, participou na presentación dunha campaña para previr as agresións sexuais na popular festa da Xira. A campaña leva por lema DE XIRA SEN AGRESIÓNS SEXISTAS, NON É NON e incluirá carteis cos que se pretende deixar claro que comportamentos non caben nas festas. Esta campaña busca a sensibilización cidadá contra as agresións sexistas.

O obxectivo é concienciar á cidadanía sobre o respecto e a igualdade, especialmente en ambientes festivos onde se pode rexistrar unha maior incidencia de comportamentos inadecuados, acoso ou agresións sexuais.

Anima ás persoas que sufran ou presencien algunha agresión sexista a denuncialo aos teléfonos de emerxencia e ás forzas e corpos de seguridade, e estabrece un Punto de axuda, atención e asesoramento ás vítimas no posto de Cruz Vermella.

Un ano máis a Xira servirá de prólogo ás festas de San Ramón e Santa María con catro días de festa rachada na que a xente moza da vila ten o maior protagonismo con música e moita diversión.

xira_agresions