Rematan as obras de mellora da escola habanera de Roupar
A directora xeral de Administración Local, Natalia Prieto, acompañada do delegado territorial da Xunta en Lugo, Javier Arias, visitou hoxe en Xermade a escola habanera Roupar, local social da asociación de veciños do mesmo nome. A Xunta colaborou no acondicionamento e na dotación de equipamento deste edificio emblemático do municipio que funciona actualmente como centro sociocultural por parte da entidade veciñal.
A través das axudas do Plan específico de acción comunitaria dotouse de novos espazos destinados ás actividades da asociación mediante unha edificación anexa respectando o valor patrimonial do inmoble. Situado xunto á igrexa parroquial e construído na segunda década do século XX, a escola habanera Roupar é un símbolo da preocupación pola cultura dos emigrantes desta parroquia.
Natalia Prieto lembrou que, mediante as subvencións deste plan, colabórase en actuacións nos espazos de asociacións de veciños e de mulleres rurais da comunidade, así como nas traídas de auga das comunidades de usuarios de auga. Deste xeito, contribúese a que estas entidades poidan levar a cabo as súas actividades que redundan na dinamización do movemento veciñal e a mellora da calidade de vida local. Ademais, son as organizacións máis próximas á cidadanía para atender e canalizar as súas demandas.
