Caen as catro torres de refrixeración da central das Pontes ante centos de curiosos
https://www.youtube.com/watch?feature=shared&v=7XtAEMLpk7c
As Pontes deu un novo paso adiante cara á desaparición da central térmica de Endesa coa voadura controlada das catro torres de refrixeración. A poboación dixo adeus a un dos símbolos máis emblemáticos da vila tras a desaparición, hai poucas semanas, do Parque dos Carbóns. A demolición destas estruturas supón un dos fitos máis importantes do proceso de desmantelamento da antiga planta de carbón, que continúa avanzando segundo o calendario previsto pola compañía.
Nesta ocasión, a voadura fíxose en dous tempos. As dúas primeiras torres, concretamente a 3 e a 4, caeron cando xa pasaban dous minutos da hora prevista, as 16.00 horas. As outras dúas foron derrubadas quince minutos despois debido a un problema no retardo das telecomunicacións, sen que iso afectase á seguridade do operativo.
Centos de persoas achegáronse aos distintos puntos habilitados para presenciar a caída dos catro xigantes de formigón, que se derrubaron en apenas 1,2 segundos acompañados do estrondo dos explosivos, un son similar ao dun espectáculo de fogos artificiais. A desaparición das torres provocou aplausos entre os asistentes, pero tamén emoción e algunha bágoa entre quen durante décadas conviviu coa silueta destas estruturas, convertidas nun dos principais sinais de identidade das Pontes.
A operación contou cun importante dispositivo de seguridade que incluíu zonas de exclusión, cortes de tráfico e restricións de acceso para garantir a protección da cidadanía. Estableceuse un amplo perímetro arredor das instalacións, diferenciando unha área de exclusión, na que estivo totalmente prohibido o acceso, e unha área de seguridade destinada a asegurar que a operación se desenvolvese sen riscos.
Ademais, entre as 15.30 e as 16.30 horas permaneceron cortadas ao tráfico varias vías de comunicación da contorna da central. As restricións afectaron á estrada AC-861 en diferentes puntos, tanto en dirección ás Pontes, Ferrol e Os Airíos, como á DP-1802 na conexión coa AC-861. Tamén se pecharon os accesos á estación depuradora, a Vilabella e á propia central térmica.
Para facer posible esta actuación deseñouse un exhaustivo procedemento técnico no que se analizaron previamente a estrutura das torres, a dinámica da voadura, a secuencia das detonacións, as direccións de caída e as medidas necesarias para minimizar vibracións e posibles afeccións ao contorno. O operativo contou coa colaboración da Garda Civil das Pontes e da Coruña, da Garda Civil de Tráfico, da Policía Local, Protección Civil, os Bombeiros das Pontes, o Concello, a Deputación da Coruña, a Axencia Galega de Infraestruturas e o equipo Pegaso da Garda Civil, encargado do control de drons na zona. Así mesmo, toda a actuación foi coordinada con Redeia debido á proximidade da súa subestación eléctrica.
As torres de refrixeración eran catro estruturas idénticas de formigón armado con forma de hiperboloide de revolución. Cada unha delas medía 99 metros de altura, tiña un diámetro de 84 metros na base e de 57 metros na parte superior. O volume de formigón e ferro empregado na súa construción era duns 4.165 metros cúbicos por torre e o seu peso aproximado alcanzaba as 11.245 toneladas, sumando entre as catro arredor de 45.000 toneladas.
Co obxectivo de reducir ao máximo o impacto ambiental da demolición instaláronse doce canóns nebulizadores de auga arredor das torres, destinados a minimizar a nube de po xerada durante a caída das estruturas, en cumprimento das condicións ambientais establecidas para o desmantelamento da central.
Tras a voadura xeráronse aproximadamente 45.000 toneladas de residuos, compostos fundamentalmente por formigón e ferro. Endesa prevé valorizar máis do 90 % destes materiais, reutilizando o ferro para novos usos industriais e empregando o formigón como material de recheo, nun proceso orientado cara ao obxectivo de "residuo cero".
A demolición das torres forma parte dun proxecto de desmantelamento que xa supera o 40 % de execución na denominada illa de potencia da central. Na actualidade traballan nas obras unha media de máis de 160 persoas ao día e mantense a previsión de finalizar esta fase en xullo de 2028. Posteriormente desenvolveranse as actuacións necesarias para clausurar os sistemas exteriores que non forman parte do actual contrato de desmantelamento. Ata o momento xa remataron os traballos no antigo parque de Saa e Espiñaredo, mentres continúan moi avanzadas as actuacións na zona de desulfuración de gases e xa se iniciaron tamén os labores nas caldeiras e nas turbinas.
Polo momento permanecerá en pé a gran cheminea da central, de 356 metros de altura, a máis alta de España, xa que se estuda a súa posible declaración como Ben de Interese Cultural (BIC) de Galicia para preservar a memoria do pasado industrial da vila.
Un colectivo local, constituído en plataforma, continúa loitando para que esta declaración se faga realidade e para que a cheminea poida conservarse unha vez remate o desmantelamento da central. Os integrantes da asociación chegaron a concentrarse e a encerrarse no consistorio en sinal de protesta e, tras seren recibidos por representantes da Xunta xunto co alcalde das Pontes, decidiron suspender as mobilizacións mentres a cheminea permaneza en pé e continúe a tramitación da súa posible protección patrimonial.