Sotavento celebrará unha xornada eólica para achegar ao público o aproveitamento da enerxía do vento
O Parque Eólico Experimental Sotavento, situado en Momán, no concello de Xermade, organizará este martes 21 de xullo unha xornada eólica destinada a divulgar os diferentes aspectos relacionados coa enerxía renovable xerada polo vento.
A actividade desenvolverase entre as 10.30 e as 12.30 horas nas instalacións do parque eólico e permitirá ás persoas participantes coñecer de preto o funcionamento desta tecnoloxía. A programación inclúe visitas guiadas ás instalacións e aos compoñentes eólicos, como as pas, a góndola ou outros elementos dos aeroxeradores.
Durante a xornada tamén se realizarán obradoiros dirixidos á cativada, unha visita ao interior dun aeroxerador e un percorrido por distintas exposicións vinculadas ao sector eólico.
A organización destaca que esta iniciativa busca ofrecer unha visión ampla sobre a enerxía do vento e o seu aproveitamento, combinando actividades divulgativas e educativas nun espazo de referencia para a investigación, a formación e a produción de enerxías renovables.
As prazas son limitadas e o prezo da actividade é de tres euros por persoa. As persoas interesadas poden reservar a súa participación a través do teléfono 652 808 173. Desde Sotavento animan á cidadanía a sumarse a esta proposta para descubrir de maneira práctica o papel da enerxía eólica na transición cara a un modelo enerxético máis sostible.