Sotavento convida a descubrir o potencial da enerxía solar cunha xornada especial coincidindo coa eclipse do 12 de agosto
O Parque Eólico Experimental Sotavento, situado en Xermade, celebrará o vindeiro 12 de agosto unha Xornada Solar coincidindo coa eclipse parcial de Sol prevista para esa mañá. A iniciativa permitirá aos asistentes coñecer de preto diferentes aplicacións da enerxía solar a través dun programa de actividades divulgativas dirixidas a todos os públicos.
A xornada desenvolverase entre as 10.30 e as 12.30 horas e incluirá unha degustación de chocolate elaborado cunha cociña solar parabólica, obradoiros sobre sistemas solares térmicos e fotovoltaicos e demostracións do funcionamento de distintos equipos de aproveitamento da enerxía do Sol.
O programa complétase cunha visita á Vivenda Bioclimática de Sotavento, onde os participantes poderán descubrir os sistemas solares activos e pasivos integrados neste edificio, así como cun percorrido polas instalacións do parque para coñecer de preto as tecnoloxías vinculadas ás enerxías renovables.
Desde a organización lembran que esta actividade non inclúe a observación da eclipse, xa que finalizará ás 12.30 horas, antes do momento de maior interese do fenómeno astronómico.
A participación ten un prezo de 3 euros por persoa e as prazas son limitadas, polo que é imprescindible realizar reserva previa chamando ao teléfono 652 808 773. A celebración dalgunhas actividades poderá estar condicionada polas condicións meteorolóxicas.
A proposta busca aproveitar a expectación xerada pola eclipse para promover o coñecemento sobre a enerxía solar e divulgar o funcionamento de diferentes tecnoloxías sostibles aplicadas tanto ao ámbito doméstico como ao industrial.