Un bando en Vilalba indica as normas básicas para a celebración da xira
![normas basicas xira vilalba portada](https://terrachaxa.com/wp-content/uploads/2022/08/normas-basicas-xira-vilalba-portada.jpg)
O Concello de Vilalba publica un bando no que se especifican as normas básicas a cumprir con motivo da celebración da XIRA 2022, os próximos días 26, 27 e 28 de agosto. A normativa busca manter a esencia deste evento, protexendo a súa imaxe e a contorna na que se celebra.
Neste sentido, o Concello recorda a prohibición de facer lume preto das arboledas, así como fóra dos espazos habilitados a tal efecto. Tamén se prega o uso adecuado dos sanitarios instalados nas inmediacións da celebración.
Ademais, lémbrase aos participantes que deben depositar os residuos nos colectores habilitados, respectando a súa recollida separada. Tamén se recorda que todos os elementos, obxectos ou aveños que utilicen para esta celebración deberán ser desmontados e/ou recollidos polos mesmos ao finalizar o evento.
Por último, o Concello de Vilalba insiste en que o lugar de celebración da Xira está catalogado como zona de Especial Conservación de valores naturais. Esta circunstancia implica a protección especial da contorna, seguindo as normas establecidas.
O Concello de Vilalba solicita aos veciños, veciñas e visitantes a súa colaboración para cumprir esta normativa, desexándolles asemade que desfruten da Xira.
![normas basicas xira vilalba](https://terrachaxa.com/wp-content/uploads/thumbs/2022/08/normas-basicas-xira-vilalba-200x200.jpg)