Un total de 40 centros educativos da provincia de Lugo participarán no programa de Almorzos Saudables
Un total de 40 centros educativos da provincia de Lugo inscribíronse este curso nas actividades do programa de Almorzos Saudables e Saúde Bucodental. As actividades deron comezo nos colexios de Meira e A Pontenova e están dirixidas ao alumnado de quinto e sexto de Primaria.
Ofrécense dúas modalidades para que cada centro elixa a máis conveniente ao seu caso. A primeira opción consiste nunha charla formativa sobre alimentación saudable xunto cunha parte práctica: o consumo dun almorzo saudable elaborado previamente no centro, para o que será imprescindible que conte coas instalacións e o persoal necesario.
A segunda posibilidade é ofrecer dúas charlas formativas e motivacionais, unha sobre alimentación saudable e outra sobre hábitos hixiénicos bucodentais impartida por un dentista colexiado.
Entre os obxectivos destes programas figuran que o alumnado se afiance en hábitos hixiénicos e dietéticos saudables, cunha alimentación san que permita cubrir as súas necesidades nutricionais e diminuír o risco de enfermidades cardiovasculares, obesidade ou diabetes.
Durante a charla, persoal experto en nutrición catalogará os diferentes grupos de alimentos e explicará a importancia do consumo de froitas e verduras, cereais e tubérculos, legumes, produtos de orixe animal -lácteos, peixe, carne e ovos- e de graxas saudables.
Tamén se deterá na importancia de comezar o día cun almorzo san así como nos produtos que se deben evitar ou consumir poucas veces nunha dieta saudable (bolería, galletas, lácteos azucrados, snacks, fiames ou bebidas azucradas, entre outros).