Valonga e Rioxoán celebrarán as súas festas patronais con música, gastronomía e actividades para todos os públicos
As parroquias de Valonga e Rioxoán, no concello de Pol, ultiman os preparativos para celebrar os días 11 e 12 de xullo as tradicionais festas na honra a Santa María, Santa Petronila e a Virxe de Guadalupe, cun programa que combinará actos relixiosos, música en directo, gastronomía popular e propostas de lecer para todas as idades.
A programación dará comezo o sábado 11 de xullo cunha misa ás 13.00 horas, seguida da procesión e dunha sesión vermú amenizada polo dúo Venus. A xornada continuará cunha comida popular na carballeira de Rioxoán, servida por Catering Sarredo, para a que será preciso reservar antes do 7 de xullo.
Pola tarde volverá actuar o dúo Venus, mentres que dentro do programa Tradigalu da Deputación de Lugo terá lugar a actuación do grupo de música tradicional Caivanca. Xa pola noite, a festa continuará cunha gran verbena protagonizada pola discoteca móbil DBC e pola formación Charleston Big Band, que presentará a súa xira 2026 Rompecinturas Tour.
As celebracións continuarán o domingo 12 de xullo cunha misa ás 12.00 horas, seguida da procesión e dunha sesión vermú a cargo do trío Luces de Bohemia, encargado tamén de poñer o acompañamento musical á última xornada festiva.
A organización destaca que o recinto contará cun campo cuberto con carpa para garantir o desenvolvemento das actividades independentemente das condicións meteorolóxicas. Ademais, durante o sábado haberá colchonetas gratuítas para os máis pequenos.
A comisión organizadora agradeceu a colaboración da veciñanza, dos anunciantes e das entidades que fan posible a celebración destas festas, que cada ano reúnen a centos de persoas arredor da tradición, a convivencia e a música no corazón da Terra Chá.