Veciños de Pino organizan unha excursión a Muxía e Vimianzo para o 13 de setembro
A Asociación Recreativa e Cultural de San Mariño de Pino, coa colaboración da Asociación Veciñal O Cruceiro de San Pedro de Seixas e da Asociación Veciñal de Vilapene, organiza unha excursión a Muxía e Vimianzo que terá lugar o vindeiro 13 de setembro.
A actividade está dirixida á veciñanza da zona e contempla unha xornada completa na Costa da Morte, con saída ás 8.00 horas desde os puntos habituais establecidos pola organización.
O programa inclúe desprazamento en autobús, almorzo, visita a Muxía e ao santuario da Virxe da Barca, xantar e unha visita posterior ao municipio de Vimianzo, onde os participantes poderán coñecer un dos seus principais atractivos patrimoniais, o castelo medieval.
O prezo da excursión será de 55 euros para as persoas socias das entidades organizadoras e de 65 euros para as non socias. As inscricións poderán realizarse ata o 4 de setembro a través de calquera membro das tres directivas colaboradoras.
Desde a organización explican que as prazas quedarán reservadas unha vez efectuado o pagamento e indican que a excursión só se levará a cabo se se acada un número mínimo de participantes.
A Asociación Recreativa e Cultural de San Mariño de Pino ten a súa sede no concello de Cospeito e promove ao longo do ano distintas actividades sociais, culturais e de lecer dirixidas á veciñanza da parroquia e da contorna.