Vilalba acolle a proxección da longametraxe San Simón dentro do ciclo Mestre Mateo 2026
O Instituto de Estudos Chairegos (IESCHA), en colaboración coa Academia Galega do Audiovisual, a Área de Cultura da Vicepresidencia da Deputación de Lugo e o Concello de Vilalba, organiza a proxección da longametraxe de ficción San Simón, dirixida por Miguel Ángel Delgado. A actividade forma parte do ciclo Mestre Mateo 2026, que permite achegar ao público as películas finalistas das diferentes categorías dos XXIV Premios Mestre Mateo, tanto documentais como longametraxes e curtametraxes.
Esta será a oitava proxección do ciclo e terá lugar este sábado 7 de novembro, ás 20.00 horas, no Auditorio Municipal de Vilalba. A entrada será gratuíta, pero será necesario reservar previamente a localidade a través da páxina web entradasvilalba.es.
A película sitúa a súa historia en outubro de 1936, cando o franquismo comezou a abrir campos de concentración por todo o territorio, aproveitando espazos como conventos, fábricas, escolas, prazas de touros e mosteiros. A illa de San Simón destacou pola súa condición insular, que a converteu nun lugar de represión e morte para os prisioneiros, obrigados a sufrir a violencia do réxime nunha contorna de extraordinaria beleza.
A trama segue a Lamas, que lembra a memoria da illa sete anos despois, cando as autoridades decretan o peche do campo de concentración. A longametraxe ten unha duración de 107 minutos.