Vilalba financiará ao 100 % os gastos das permutas de terras para favorecer explotacións agrarias máis rendibles
O Concello de Vilalba porá en marcha un novo programa de agrupamento de terras de uso agrario co obxectivo de facilitar a creación de parcelas de maior tamaño e mellorar a rendibilidade das explotacións gandeiras e agrícolas do municipio. A iniciativa permitirá subvencionar o 100% dos gastos notariais e rexistrais derivados das permutas voluntarias entre propietarios.
O proxecto busca facer fronte a dous dos principais problemas do sector agrario galego, como son a dispersión das parcelas e o minifundio. A través deste sistema, os propietarios poderán intercambiar terreos de forma consensuada para concentrar as súas fincas e facilitar o seu aproveitamento produtivo.
Segundo explicou o vicealcalde de Vilalba, Modesto Renda, a medida desenvolverase ao abeiro da Lei de recuperación da terra agraria de Galicia e basearase na participación voluntaria das persoas interesadas. Os intercambios deberán ser acordados de forma bilateral entre os propietarios das parcelas implicadas.
O Concello asumirá integramente os gastos de notaría e de inscrición no Rexistro da Propiedade, o que permitirá reducir os custos asociados a este tipo de operacións. Ademais, a creación de parcelas de maior tamaño facilitará o traballo diario das explotacións, reducirá os desprazamentos e optimizará o uso da maquinaria agrícola e dos servizos especializados.
A iniciativa tamén pretende contribuír a frear o abandono de terras agrarias, favorecendo que parcelas pertencentes a persoas xubiladas ou residentes fóra do municipio poidan ser aproveitadas por profesionais do sector agrogandeiro.
O prazo inicial previsto para presentar solicitudes era dun mes desde a publicación das bases no Boletín Oficial da Provincia, pero o Concello xa anunciou a tramitación dunha modificación para amplialo ata os tres meses. A decisión responde ás previsións dunha elevada participación e ás recomendacións trasladadas polas organizacións profesionais agrarias, coas que o Goberno local manterá contacto durante todo o proceso.