Vilalba proxecta o documental 'O silencio herdado' dentro do Ciclo Mestre Mateo 2026
O Auditorio Municipal de Vilalba acollerá o domingo 18 de outubro a proxección de 'O silencio herdado', un documental de Lucía Dapena González que forma parte da programación do Ciclo Mestre Mateo 2026. A sesión comezará ás 20:00 horas e a entrada será de balde, aínda que será necesario reservar previamente a localidade.
A actividade está organizada polo Instituto de Estudos Chairegos (IESCHA) en colaboración coa Academia Galega do Audiovisual, a Área de Cultura da Vicepresidencia da Deputación de Lugo e o Concello de Vilalba.
Esta será a sétima sesión do ciclo, que permite achegar ao público as películas finalistas das diferentes categorías dos XXIV Premios Mestre Mateo, incluíndo documentais, longametraxes e curtametraxes.
As persoas interesadas en asistir poden reservar as súas localidades a través da páxina web entradasvilalba.es.