Vilalba Remata esta fin de semana as Xornadas Rosalianas

TerraChaXa
O Concello de Vilalba, a Nova Poesía Guitírica (NPG) e o Instituto de Estudos Chairegos (Iescha) volven unirse para as Xornadas Rosalianas.
plantacion pensamentos xornadas rosalianas
plantacion pensamentos xornadas rosalianas
24 feb 2023

O Concello de Vilalba, a Nova Poesía Guitírica (NPG) e o Instituto de Estudos Chairegos (Iescha) volveron unirse para a celebración da segunda edición das Xornadas Rosalianas, unha iniciativa que botou a andar o pasado ano coincidindo coa inauguración do parque na honra da escritora galega.

Tralo éxito acadado na súa estrea, as tres entidades programaron para este 2023 un mes de febreiro cheo de actividade co obxectivo de por en valor a figura de Rosalía de Castro como unha muller sobranceira das nosas letras e unha figura clave na cultura galega.

As diferentes actividades previstas comezaron o venres día 17 coa inauguración da mostra Lieders, de Clara Martín, na sala de exposicións do Auditorio Municipal en alusión ao artigo, datado no 1858, e considerado como o primeiro manifesto feminista publicado en Galicia.

Para rematar este ciclo, hoxe venres, está organizado nos CEIP Terrá Chá, Román, Insua Bermúdez e Mato Vizoso o obradoiro Buscando a Rosalía a cargo de Raquel Queizás, que dará paso, ao día seguinte, a un relatorio de Martín Pawley, crítico de cine, programador e produtor, sobre Rosalía nas pantallas.

A longa lista de actos inclúe tamén o sábado día 25, no parque Rosalía de Castro, un Recital-Concerto a cargo da Nova Poesía Guitirica, coa participación e acompañamento de grupos e entidades locais, mentres que se baixará o telón das Xornadas Rosalianas co pregón da artista multidisciplinar Luz Darriba e a actuación do Dúo Vaguedades, que interpretarán a Rosalía de Castro e a Eduardo Pondal. A cita é ás 20:00 horas no Auditorio Municipal de Vilalba.

Nesta segunda edición, as tres entidades organizadoras, representadas por mulleres, insisten no seu obxectivo de subliñar o legado de Rosalía de Castro non só como figura emblemática da literatura galega e española, senón tamén como símbolo do pobo galego en eidos como a cultura, a lingua e o feminismo.

XA REALIZADO

O sábado 18, na entrada do Auditorio Municipal Anxo Angueira, presidente da Fundación Rosalía de Castro, fixo un relatorio baixo o título Rosalía Sempre!. Este encontro tivo continuación cunha ofrenda floral no Parque Rosalía de Castro que incluiu un recitado a cargo de alumnado do Ies Basanta Silva, ademais de acompañamento musical.

O alumnado infantil de Vilalba tamén foi partícipe desta homenaxe á gran escritora galega, coa realización de pensamentos que serán recollidos e colocados no parque polos usuarios e usuarias do obradoiro de xardinaría do Centro Ocupacional. Nesta segunda edición, que implica a distintos sectores de toda a vila, realizouse unha gran mostra de Rosalías debuxadas polo alumnado de Primaria na entrada do Auditorio Municipal.

A axenda de actividades continuou o luns día 20 de febreiro cun recital poético e unha audición de música na Residencia de Maiores de Vilalba co epígrafe Lembrando a Rosalía (actividade interna).

cartel xornadas rosalianas