Vilalba ultima o prazo para solicitar o servizo de madrugadores e o comedor da Escola Infantil
O Concello de Vilalba mantén aberto ata este martes, 30 de xuño, o prazo para solicitar ou renovar a praza nos servizos de madrugadores e comedor da Escola de Educación Infantil (EEI) de Vilalba de cara ao vindeiro curso escolar.
Desde o goberno local destacan que estas prestacións forman parte das medidas impulsadas para facilitar a conciliación da vida laboral, familiar e persoal das familias do municipio, adaptando os servizos ás necesidades cotiás da veciñanza.
No caso do servizo de madrugadores, ofértanse un total de 120 prazas. As solicitudes poden presentarse a través da sede electrónica municipal ou no Rexistro Xeral do Concello. Ademais, os formularios necesarios tamén están dispoñibles nos centros educativos.
Pola súa banda, as peticións para acceder ao servizo de comedor da EEI de Vilalba poderán tramitarse igualmente por vía telemática ou presencial no Rexistro Xeral. As instancias poden recollerse tanto na propia escola infantil como no Departamento de Servizos Sociais do Concello.
O servizo de madrugadores estará dispoñible nos centros educativos CEIP Antonio Insua Bermúdez, CEIP Manuel Mato Vizoso, EEI de Vilalba e CEIP Terra Chá.
Desde o Concello sinalan que a continuidade destes programas responde ao compromiso municipal de apoiar ás familias e favorecer a conciliación, ao tempo que se consolidan recursos educativos e sociais que contribúen a mellorar o día a día da comunidade escolar.