Vilapedre acolle un obradoiro de cociña saudable o venres
A Asociación de Veciños de Vilapedre, en Vilalba, dará comezo á súa nova tempada de cursos e obradoiros cunha proposta centrada na alimentación sa. A entidade organizará o vindeiro venres 9, ás 19.00 horas, un obradoiro de cociña saudable na Casa da Escola de Vilapedre.
A sesión será impartida pola dietista Natalia Alonso Ares, de Nutrivitalia, co obxectivo de achegar aos participantes recursos prácticos para mellorar os seus hábitos nutricionais cotiáns. Durante a xornada, os asistentes aprenderán a comer de forma máis saudable no día a día, recollerán ideas de receitas rápidas, sinxelas e sas, e poderán degustar as elaboracións preparadas pola profesional.
A actividade ten un prezo de 25 euros por persoa. As persoas interesadas en participar e formalizar a súa inscrición poden facelo poñéndose en contacto a través dos números de teléfono 682 270 203 ou 695 660 644.