Villares estima 1.967 millóns de euros de investimento na provincia de Lugo nos orzamentos da Xunta
A Xunta de Galicia prevé destinar á provincia de Lugo 1.967 millóns de euros nos orzamentos autonómicos de 2027, o que equivale a un investimento de 6.025 euros por habitante e supón un incremento do 6,4 % con respecto ao exercicio actual. Así o anunciou o delegado territorial do Goberno galego en Lugo, Alfonso Villares, durante a presentación das principais partidas previstas para a provincia.
Os orzamentos da comunidade autónoma ascenden a 15.158 millóns de euros, un 6,4 % máis que no presente exercicio. Segundo destacou Villares, o gasto social volve concentrar boa parte dos recursos, con máis de 11.000 millóns de euros destinados a educación, sanidade pública, política social —especialmente á atención á dependencia— e emprego.
A vivenda figura entre as principais prioridades das contas para o próximo ano. Neste ámbito, Lugo contará cun investimento previsto de 73,7 millóns de euros, un 18 % máis que en 2026. Os fondos destinaranse á construción e promoción de vivenda pública, á mobilización de solo e ao apoio ás familias para a compra ou o alugueiro. Ademais, reservarase máis dun millón de euros para programas de rehabilitación de vivendas no rural.
En materia de infraestruturas viarias, a Xunta prevé investir 7,85 millóns de euros na conversión en autovía do corredor Nadela-Sarria, unha partida que aumenta un 57 % respecto ao exercicio actual. As obras de desdobramento do último treito, entre a rotonda de Nadela e o enlace da Pobra de San Xiao, permitirán completar a conexión por autovía entre Lugo e Sarria, mellorando a seguridade viaria e reducindo os tempos de desprazamento.
As contas inclúen tamén 3,15 millóns de euros para a VAC Costa Norte e o inicio da execución da variante leste de Viveiro, así como dous millóns para o acondicionamento da estrada LU-231, que conecta os municipios de Begonte, Friol e Palas de Rei. A estas partidas súmanse outros dous millóns de euros para a Rolda Leste de Lugo.
A conservación e o mantemento da rede viaria provincial contarán con máis de 19 millóns de euros, mentres que outros catro millóns se destinarán a fomentar a mobilidade sostible, entre outras actuacións mediante a creación de sendas peonís.
No ámbito sanitario, unha das principais partidas será a de 12,3 millóns de euros para o Plan Director do Hospital da Mariña, cuxas actuacións foron licitadas este ano. Ademais, destinaranse 800.000 euros a avanzar no Plan Director do Hospital de Monforte.
A atención primaria tamén contará con investimentos específicos. Entre as actuacións previstas figuran a construción do centro de saúde de Antas de Ulla, cunha partida de 1,5 millóns de euros; a reforma do centro de saúde de Outeiro de Rei, con 200.000 euros; e a finalización da reforma integral do centro de saúde da Milagrosa, en Lugo, á que se asignan 870.000 euros.
En política social, a Xunta manterá os apoios ás persoas dependentes, ás familias e á conciliación. Para o próximo ano está prevista a posta en marcha do Centro de Atención Integral para persoas con autismo en Friol, así como de unidades de atención temperá en Viveiro e Ribadeo, co obxectivo de ampliar a cobertura destes servizos na comarca da Mariña. Tamén se manterán medidas como a gratuidade das escolas infantís, o Servizo de Axuda no Fogar e os bonos de dependencia e conciliación.
Os orzamentos recollen igualmente actuacións para mellorar os centros educativos da provincia, con investimentos destinados á súa modernización, eficiencia e adaptación ás necesidades da comunidade educativa. Entre as intervencións previstas están a ampliación do CEIP Laverde Ruiz, en Outeiro de Rei, cunha partida de 700.000 euros, e a renovación e substitución da cuberta das naves dos talleres do IES María Sarmiento, en Viveiro, con 400.000 euros.
Tamén continuarán as obras de ampliación do CEIP de Nadela, en Lugo, cun investimento de 1,3 millóns de euros nesta anualidade, e as actuacións no CEIP Frei Luís de Granada, en Sarria, que contará con 450.000 euros para o peche perimetral e a cuberta da pista.
O ámbito rural experimentará un incremento destacado dos recursos, cun investimento previsto de 41 millóns de euros, un 29 % máis que no exercicio actual. Dentro desta partida, duplicarase o investimento destinado á reestruturación parcelaria e á mellora de camiños e infraestruturas rurais, que superará os 16 millóns de euros. A prevención e defensa contra os incendios forestais contará con 6,4 millóns.
Pola súa banda, Augas de Galicia investirá na provincia 23,8 millóns de euros, un 42,25 % máis que no actual exercicio. Segundo os datos presentados, Lugo será a provincia na que máis medre o orzamento deste organismo. Entre as actuacións previstas figuran melloras no abastecemento de auga en Ribadeo, Trabada, Baralla, Castro de Rei e Friol, así como intervencións de saneamento e depuración en Burela, Outeiro de Rei, Portomarín, Foz e Pantón.
No eido económico, a Xunta reserva arredor de 5,6 millóns de euros para ampliar os parques empresariais do Corgo, Palas de Rei, Meira, As Gándaras, A Pontenova e Xove. Ademais, destinaranse máis de 600.000 euros aos polos de emprendemento de Mondoñedo, A Fonsagrada, Friol, Sarria e Monforte, e máis de 290.000 euros aos centros públicos de formación para o emprego de Viveiro, Lugo e Monforte.
O apoio aos concellos tamén terá presenza nas contas autonómicas. No marco do inicio da aplicación da nova Lei de Administración Local de Galicia, os municipios lucenses disporán de 5,5 millóns de euros a través de distintas liñas de axuda para reforzar a Administración local e mellorar os servizos á cidadanía, especialmente nos municipios de menor tamaño.
Villares sinalou que os orzamentos tamén inclúen investimentos nos ámbitos cultural e turístico, con atención especial ás actuacións vinculadas á celebración do Ano Xacobeo, así como melloras nas instalacións xudiciais e nos portos da provincia.
O delegado territorial defendeu que as contas reflicten o compromiso da Xunta co desenvolvemento económico e social de Lugo e co futuro da provincia, mediante investimentos repartidos polo territorio e dirixidos a atender as necesidades da cidadanía, tanto nas principais cidades como nos concellos máis pequenos.