Xermade acollerá unha gran celebración polos 100 anos do Sindicato e os 30 de Amuraxe
A asociación Amuraxe organiza en Xermade unha destacada xornada festiva para conmemorar un dobre aniversario moi especial: os 100 anos de historia do Sindicato e os 30 anos da propia entidade. A celebración terá lugar o sábado 6 de xuño de 2026 na Praza do Concello, cun programa pensado para reunir á veciñanza arredor da música, a gastronomía e a convivencia.
A xornada comezará ás 13.30 horas cun acto de benvida no local do Sindicato, ao que seguirá unha sesión vermú amenizada polo grupo Lusco e Fusco. Posteriormente, ás 15.00 horas, celebrarase un xantar popular cun menú composto por empanada, paella, carrilleiras, sobremesa, café e licores. O prezo será de 30 euros, mentres que os nenos e nenas ata 12 anos poderán asistir de balde.
Xa pola tarde, a festa continuará coa actuación da solista María e unha verbena que se prolongará ata ben entrada a noite, mantendo o ambiente festivo “ata que o corpo aguante”.
As persoas interesadas en asistir poden adquirir as súas entradas a través dos membros da directiva de Amuraxe ou en distintos establecementos de Xermade, como Xermade Alimentación, Bar Casal, Bar Pita e Comercial Pita.
Desde a organización animan á participación nesta cita sinalada, que busca celebrar a historia compartida e reforzar os lazos da comunidade local.