Xermade contará coa representación teatral 'Expectativa Lonxana' este sábado
A Escola Habaneira de Roupar acollerá a obra de teatro Expectativa Lonxana o sábado 16 de novembro. A comedia, a cargo da Asociación Cultural Teatral Nova Escena, está destinada a un público maior de 14 anos e dará comezo a partir das 19:00 horas, cunha duración de 90 minutos.
A actuación enmárcase dentro do programa Circuíto teatral afeccionado da Área de Cultura da Deputación Provincial de Lugo.
Conta a historia de catro mulleres que se atopan de casualidade no mesmo banco dun parque, onde quedaron co que esperan que sexa o seu amor definitivo.
Mentres esperan, van falando dos seus desexos e fantasías, descubrindo que teñen varias cousas en común e chegando á conclusión de que o xeito de establecer vínculos é cada vez máis intanxible e difícil, convertendo a busca da súa parella nunha aventura para facer realidade a Expectativa Lonxana de atopar o amor.