Xermade entrega os premios do certame Xermadeando pola Igualdade o vindeiro 29 de xuño
O Concello de Xermade entregará o vindeiro luns 29 de xuño os premios da edición 2026 do certame Xermadeando pola Igualdade, unha iniciativa que promove os valores da igualdade entre a mocidade do municipio e que xa deu a coñecer os gañadores.
O acto celebrarase ás 17:15 horas na Biblioteca de Xermade e servirá para recoñecer os traballos gañadores nas tres categorías establecidas no concurso. Na categoría A, o primeiro premio foi para Kendra Toledo Caparrós, seguida de Marco Pena Caaveiro e Idril Toledo Caparrós. Na categoría B, a gañadora foi Valeria Freire Paz, mentres que Yago Cendán Pico acadou o segundo posto e Uxía Cazás Pardiñas o terceiro. Na categoría C, o primeiro premio recaeu en Samuel Romero Baamonde, seguido de Elena Gato Ares e Xenxo Romero Díaz.
Tras a entrega dos galardóns, ás 17:30 horas, terá lugar o contacontos Mulleres de Pedra, unha proposta cultural centrada en historias de mulleres fortes, resilientes e inspiradoras. A actividade pretende achegar ao público relatos que poñen en valor a memoria e o papel das mulleres ao longo do tempo.
A iniciativa enmárcase nas accións de sensibilización e promoción da igualdade impulsadas polo Concello de Xermade e conta co financiamento do Ministerio de Igualdade, a través da Secretaría de Estado de Igualdade e contra a Violencia de Xénero, dentro do Pacto de Estado contra a Violencia de Xénero.