Xunta e Concello da Pastoriza reúnense para traballar en proxectos de interese municipal
O delegado territorial da Xunta en Lugo, Javier Arias, mantivo unha reunión de traballo co alcalde e o tenente de alcalde da Pastoriza, Darío Cabaneiro e Marcos García Lombardero, para analizar as principais demandas e necesidades do municipio naqueles ámbitos que son competencia da Administración autonómica, así como para avaliar posibles vías de colaboración.
Na xuntanza referíronse ademais a recentes investimentos do Goberno galego no concello chairego, como os máis 483.000 destinados a mellorar o firme da estrada LU-122; os máis de 88.000 euros para actualizar a rede de abastecemento de auga; ou os 60.000 euros aportados ao amparo do fondo adicional ao Fondo de Cooperación Local do pasado ano para mellorar a eficiencia enerxética no centro deportivo con piscina da localidade.
Arias destacou a importancia da cooperación entre as administracións autonómica e local “para garantir servizos e dotacións que nos permitan equilibrar as condicións de vida en todo o territorio” e, neste senso, trasladoulle aos representantes municipais “o compromiso da Xunta de seguir traballando de forma conxunta para desenvolver iniciativas que garantan o benestar dos veciños e veciñas da Pastoriza”.