Xurxo Souto presenta este venres nas Pontes as súas obras sobre os Bravú
O Museo Etnográfico Monte Caxado das Pontes acollerá este venres 8 de maio unha presentación literaria centrada no movemento Bravú da man do escritor e músico Xurxo Souto. O acto celebrarase ás 19.30 horas e servirá para dar a coñecer as publicacións A novela do Bravú e Somos un pobo de artistas.
A actividade está organizada polo Museo Etnográfico Monte Caxado e conta coa colaboración do Concello das Pontes e da libraría Xandra. A cita pretende converterse nun encontro arredor da cultura galega contemporánea e dun fenómeno musical e social que marcou unha xeración nos anos noventa.
Xurxo Souto, unha das figuras máis recoñecidas do movemento Bravú, compartirá co público reflexións e experiencias vinculadas a aquel movemento cultural que combinou música, identidade galega e reivindicación social. A presentación terá lugar no espazo do museo pontés, que continúa programando actividades culturais vinculadas á memoria e á creación galega.