A Asociación de Veciños de Roupar organiza un programa de ximnasia de mantemento para o curso 2026-2027
A Asociación de Veciños de Roupar organiza un programa de ximnasia de mantemento para o curso 2026-2027, pensado para persoas adultas e maiores que queiran manterse activas, mellorar a súa mobilidade e coidar a súa saúde sen necesidade de realizar adestramentos intensos.
A actividade combinará exercicios de mobilidade articular, forza suave, equilibrio e estiramentos, co obxectivo de contribuír a mellorar a condición física, manter a autonomía e favorecer o benestar xeral. Entre os beneficios sinalados pola organización están a mellora da mobilidade e da flexibilidade, o fortalecemento de músculos e articulacións, o coidado da saúde mental e emocional e o fomento da socialización.
As sesións desenvolveranse na Escola Habanera de Roupar os luns e mércores, das 18.00 ás 19.00 horas. O programa comezará o luns 5 de outubro de 2026 e prolongarase ata xuño de 2027.
O prezo será de 20 euros ao mes por persoa e será necesario contar cun mínimo de dez persoas anotadas para que se leve a cabo a actividade. As clases serán impartidas pola entidade Terra Chá.
A proposta busca ofrecer unha actividade física moderada nun ambiente agradable, combinando exercicio, saúde e socialización ao longo do curso.