A Feira de Fungos e Cogomelos das Pontes ofrecerá dous obradoiros para os que está aberta a inscrición
A XXXVI Feira de Fungos e Cogomelos das Pontes incluirá este sábado, 31 de outubro, dous obradoiros de micogastronomía destinados a achegar ao público as posibilidades culinarias dos cogomelos. As actividades desenvolveranse na carpa instalada na praza de América e estarán dirixidas tanto aos máis pequenos como ás persoas adultas.
As sesións estarán conducidas por Fabián Rondón, recoñecido como Mellor Cociñeiro de Cogomelos de Galicia en 2025, que ofrecerá dúas demostracións de cociña nas que os cogomelos serán os protagonistas.
A primeira actividade será un showcooking infantil, previsto para as 17.00 horas. A proposta busca que os nenos e nenas descubran o mundo dos cogomelos dunha maneira divertida e participativa, experimentando coa cociña e coñecendo as posibilidades deste produto.
Ás 19.00 horas terá lugar o showcooking para adultos, un obradoiro no que se presentarán receitas orixinais e novas formas de preparar e degustar os cogomelos, coñecidos tamén como o «marisco dos nosos montes».
Con estas actividades, a Feira de Fungos e Cogomelos das Pontes amplía a súa programación cunha proposta gastronómica que combina divulgación, aprendizaxe e cociña, poñendo en valor un dos produtos máis representativos do outono.
As persoas interesadas en participar poden inscribirse nesta ligazón para reservar a súa praza. Os obradoiros celebraranse na carpa da praza de América, no marco da trixésimo sexta edición da feira.