As familias do CEIP Virxe do Corpiño de Begonte mobilizáronse para reclamar o desdobramento de Infantil
As familias do CEIP Virxe do Corpiño de Begonte mobilizáronse este mércores para reclamar máis recursos humanos no centro educativo, especialmente na etapa de Educación Infantil. A protesta levou a máis de 70 escolares e ás súas familias, unhas cen persoas en total, a concentrarse diante do colexio e posteriormente abandonar as instalacións sen incorporarse ás aulas.
A principal demanda da Anpa céntrase na situación de Infantil, onde este curso hai 27 alumnos matriculados. A entidade considera que a presenza dun escolar que computa por tres fai que a cifra equivalente chegue aos 29 alumnos, unha situación que, ao seu xuízo, fai necesario dividir o grupo e incrementar o número de docentes para cumprir coas ratios establecidas.
As familias comparan esta situación coa doutros centros da contorna e sinalan que no colexio de Rábade, con cinco alumnos menos, dispoñen de tres profesores e outro docente de apoio. A Anpa tamén trasladou as súas preocupacións pola situación de varios alumnos de Primaria que precisan atención específica.
As reclamacións foron trasladadas á Xunta a través dun escrito presentado este martes, no que as familias solicitaron unha resposta e solucións para as necesidades detectadas no centro.
Desde a Consellería de Educación comunicaron que o colexio contará cun novo docente para prestar apoio tanto en Infantil como en Primaria. O profesional incorporado é especialista en Pedagoxía Terapéutica e permitirá ao centro reorganizar os recursos dispoñibles en función das necesidades do alumnado.
A chegada deste reforzo levou finalmente a Anpa a suspender a mobilización que estaba prevista para continuar durante o resto da semana. Deste xeito, os escolares retomaron a actividade lectiva despois de que se confirmase a incorporación do novo docente.
A protesta desenvolveuse nun contexto de preocupación das familias pola atención ao alumnado con necesidades específicas e pola distribución dos recursos docentes no inicio deste curso escolar.