Entregados os premios da campaña de comercio local desenvolvida en Meira e Pastoriza
O Paseo Central da Praza Maior de Meira acolleu esta mañá a Entrega dos Premios correspondentes á campaña Merca no teu comercio, que se desenvolveu entre o 15 e o 30 de xuño nos municipios de Meira e Pastoriza.
Entre os consumidores que mercaron nos establecementos destas localidades durante a iniciativa, na que se rexistraron 2.444 tickets, sorteouse un total de 1.000 euros, repartidos en 20 tarxetas prepago de 50 euros. Os gañadores recibiron esta mañá o seu premio, que deberán empregar en novas compras no comercio de proximidade local.
Merca no teu comercio ten premio é unha campaña de promoción e dinamización das vendas do comercio de proximidade dos municipios rurais organizada pola Federación de Comercio de Lugo, a Federación Galega de Comercio e a Xunta de Galicia, cos comerciantes e o Concello de Meira e o de Pastoriza.
Na entrega de premios desta mañá participaron representantes das entidades organizadoras; entre eles, José María Seijas, presidente da Federación Galega de Comercio e da Federación de Comercio de Lugo; Antonio de Dios, alcalde de Meira; así como Rubén Vázquez, director da oficina de ABANCA en Meira.