Medio Rural destina unha serie de axudas para o control de incendios forestais
![Captura de pantalla 2019 07 18 a las 13.22.22](https://terrachaxa.com/wp-content/uploads/2019/07/Captura-de-pantalla-2019-07-18-a-las-13.22.22.png)
A Consellería do Medio Rural achegará máis de 1.130.000 euros na provincia de Lugo a 126 beneficiarios das subvencións para a prevención dos danos causados aos bosques por incendios, desastres naturais e catástrofes. Estes apoios están destinados a titulares de montes veciñais en man común, agrupacións e mancomunidades e a Sociedades de Fomento Forestal (Sofor).
Estas achegas teñen como obxectivo minorar os impactos negativos que os incendios forestais poidan provocar sobre a capacidade potencial de desenvolvemento e produción dos montes e, en conxunto, garantir a protección axeitada á fauna, a flora e á paisaxe do territorio.
Con este obxecto a Xunta ofrece dúas liñas de subvencións: unha para o control selectivo de combustible forestal e outra para a construción de puntos de auga. Son ademais accións deseñadas polos propios solicitantes que presentan un plan de traballo con este obxecto e que se comprometen a levar a cabo estas tarefas nun prazo de catro meses desde a notificación da axuda concedida.
A porcentaxe que se subvenciona pode chegar ao 100% do custe destas accións, polo tanto, as comunidades beneficiarias só deberán achegar o IVE.
No conxunto de Galicia, o montante destas subvencións superou os 4,5 millóns de euros e chegan a máis de 500 beneficiarios. Estas achegas están cofinanciadas co Fondo Europeo Agrícola de Desenvolvemento Rural (Feader)