No balance diario do coronavirus a atención está en catro casos novos en Vilalba
![covid 19 (1)](https://terrachaxa.com/wp-content/uploads/2017/07/covid-19-1.jpg)
A cifra de casos de coronavirus activos na área Sanitaria de Lugo mantense estable en 160, tal e como avanzou hoxe o Sergas. Os datos polo tanto reflicten tres novos casos, os tres de Vilalba, que contrarrestan outras tantas altas dadas durante a xornad ade onte.
O resto de infectados, 155, recupéranse nos seus domicilios. Desde o inicio do plan de continxencia do Covid-19 curáronse na provincia 1.035 pacientes (tres máis que o xoves) e faleceron por este virus na área sanitaria 28 persoas.
Nas últimas horas reduciuse noutros dous o número de casos activos relacionados co brote de covid-19 que afecta ao distrito sanitario da Mariña. Das 91 PCR realizadas nesta última xornada, dúas resultaron positivas. A maiores, nas últimas horas, outras catro persoas positivas en Covid-19 foron dadas de alta tras curarse e superar a enfermidade, o que deixa o número de casos activos en 138, é dicir, dous menos ca onte. Dende o inicio do brote e ata o día de hoxe son máis de setenta as persoas afectadas por Covid-19 e vencelladas ao brote que xa están curadas e foron dadas de alta.
Polo de pronto, a situación na Mariña dase por controlada, onde os concellos, agás Burela, recuperaron a mobilidade a as normas da nova normalidade. No Concello burelés esperan poder recuperar esa situación a próxima semana debido á positiva evolución do virus.
A atención está agora posta en Vilalba, onde foron diagnosticados tres casos na xornada de onte que pasaron a ser catro esta mañana, todos eles vinculados entre si. O Concello xa tomou medidas de precaución e lembra á poboación a necesidade de manter as distancias e o uso continuado de máscaras.
GALICIA
Dirección Xeral de Saúde Pública da Consellería de Sanidade informa que, na última actualización, o número de casos activos de coronavirus en Galicia é de 224, deles 27 son da área da Coruña, 160 da de Lugo, 4 da de Ourense, 8 da de Pontevedra, 17 da área de Vigo, 7 da de Santiago, e 1 da de Ferrol.
Dentro do total de casos rexistrados en Galicia hai un vinculado con residencias de maiores, que corresponde a un traballador dun centro de Burela, mentres os xeriátricos seguen sen usuarios infectados.
Sanidade apunta que, ata a data, curáronse en Galicia 11.034 persoas, 16 máis que a xornada anterior, e faleceron 619 pacientes con Covid. A última vítima foi notificada o 10 de xuño, que se corresponde cun home de 83 anos que estaba ingresado no Complexo Hospitalario Universitario de Vigo. Do total, 274 estaban vinculadas con residencias.