Eventos

A iniciativa celebrarase durante dúas fins de semana, os días 23, 24 e 25, e os días 30 e 31 de outubro e 1 de novembro

O Concello das Pontes promove unha nova edición de As Pontes, Terra de Cogomelos, un programa que alcanza a súa sexta edición e que ten como obxectivo poñer en valor a riqueza micolóxica do municipio, impulsar a gastronomía local e favorecer a dinamización económica e turística da vila.

Dentro desta programación, as xornadas micogastronómicas adoptan este ano o nome de Marisco de Monte. A iniciativa celebrarase durante dúas fins de semana, os días 23, 24 e 25 de outubro, e os días 30 e 31 de outubro e 1 de novembro. Esta segunda quenda coincidirá coa celebración da XXXVI Feira de Fungos e Cogomelos, unha das citas destacadas do calendario outonal das Pontes.

Nesta edición participarán 14 establecementos hostaleiros, que ofrecerán diferentes propostas culinarias elaboradas con cogomelos, desde pratos e racións ata menús especiais, pizzas e tapas. A oferta permitirá achegar á veciñanza e ás persoas visitantes distintas formas de degustar este produto de tempada e descubrir a súa versatilidade gastronómica.

Os 14 establecementos hostaleiros participantes son 7 Camiños, A Cepa, A Taberna de Pancho, Delapiccola, La Grupetta del Lago, La Tremenda, O Martínez, O Medulio, O Puxigo, Trastoy 3, A Fervenza de Somede, Excalíbur, O Colador e Venus.

Os establecementos ofrecerán propostas distribuídas en tres modalidades: pratos e racións, menús especiais e tapas a un prezo de 3,50 euros, de acordo coa programación e os horarios establecidos para cada local.

A sexta edición de As Pontes, Terra de Cogomelos busca reforzar a relación entre os recursos naturais do territorio, a gastronomía e a actividade económica local. A participación do sector hostaleiro resulta fundamental para dar a coñecer as posibilidades culinarias dos cogomelos e contribuír á promoción das Pontes como destino gastronómico durante o outono.

A coincidencia das xornadas coa XXXVI Feira de Fungos e Cogomelos permitirá, ademais, ofrecer unha proposta complementaria ás persoas que se acheguen ao municipio durante esas datas, combinando a programación vinculada á micoloxía coa degustación de elaboracións gastronómicas nos establecementos participantes.

Con esta iniciativa, o Concello das Pontes continúa apostando pola promoción dos produtos de tempada, o apoio á hostalaría e a posta en valor dos recursos propios, consolidando As Pontes, Terra de Cogomelos como unha proposta que une gastronomía, tradición e dinamización turística.