Presentan nas Pontes o programa deste ano que Espazo en Familia desenvolverá nos colexios
O Concello das Pontes, a través da Concellería de Benestar Social e Educación, pon en marcha a nova programación de Espazo en Familia para o curso 2026-2027, unha iniciativa socioeducativa que reforza a colaboración cos centros educativos como elemento fundamental para a prevención, a promoción do benestar e o acompañamento á infancia e á adolescencia.
O programa aposta polo traballo conxunto entre o Concello e a comunidade educativa, ofrecendo aos centros escolares un catálogo de actividades adaptadas ás diferentes etapas educativas e ás necesidades do alumnado. Esta coordinación permite complementar o labor que se realiza nas aulas, abordar cuestións relevantes para o desenvolvemento dos menores e favorecer unha resposta educativa máis próxima á súa realidade.
A nova programación inclúe obradoiros e experiencias educativas dirixidas a Educación Infantil, Educación Primaria e ESO e Formación Profesional Básica (FPB), con propostas que combinan a aprendizaxe práctica, a reflexión e a participación do alumnado. As temáticas abranguen aspectos como o desenvolvemento emocional, a autoestima, os hábitos saudables, o uso responsable da tecnoloxía, a prevención do acoso escolar, a educación financeira e a sensibilización ambiental.
En Educación Infantil, as actividades céntranse na experimentación, o descubrimento do contorno, o coñecemento persoal e o benestar emocional. A través de propostas creativas e sensoriais, trabállanse habilidades básicas que contribúen ao desenvolvemento integral dos nenos e nenas desde as primeiras etapas educativas.
Para Educación Primaria, os centros poderán escoller unha temática por curso, cun total de tres sesións, entre diferentes iniciativas relacionadas coa seguridade dixital, a autoestima, a alimentación saudable, a seguridade viaria, a educación financeira e o coidado do medio ambiente. Estas actividades buscan reforzar competencias persoais e sociais, fomentar a autonomía e promover hábitos responsables a través de experiencias participativas.
No caso do alumnado de ESO e Formación Profesional Básica, as propostas abordan cuestións de especial relevancia durante a adolescencia, como as relacións saudables, o respecto, a prevención do acoso escolar e do ciberacoso, a saúde mental e os riscos asociados ás apostas e ás ludopatías. Os centros poderán seleccionar a temática que mellor se adapte ás necesidades do seu alumnado e desenvolvela ao longo de tres sesións.
A través desta programación, Espazo en Familia pretende ofrecer aos centros educativos recursos complementarios para traballar aspectos que van máis alá dos contidos académicos e que resultan fundamentais para a convivencia, a prevención de condutas de risco e o desenvolvemento persoal do alumnado.
A colaboración cos equipos educativos permite achegar estas iniciativas á realidade de cada centro, reforzar a coordinación entre os ámbitos educativo e social e favorecer a detección e abordaxe temperá de necesidades. Deste xeito, o programa contribúe a construír contornas escolares máis seguras, inclusivas e saudables, nas que a educación emocional, a convivencia e a prevención teñan un papel destacado.
Espazo en Familia mantén, ademais, o seu compromiso co acompañamento ás familias, promovendo unha relación máis estreita entre os centros educativos e o ámbito familiar. O obxectivo é avanzar nunha actuación coordinada que permita compartir recursos, apoiar o labor educativo e ofrecer aos nenos, nenas e adolescentes ferramentas para afrontar os retos das distintas etapas do seu desenvolvemento.