San Martiño de Pino acollerá un obradoiro para promover o autocuidado a través de pequenas rutinas diarias
A Biblioteca Rural de San Martiño de Pino, no municipio de Cospeito, será o escenario este venres dun obradoiro centrado no benestar persoal e na promoción de hábitos saudables. A actividade, titulada "Enerxía vital en 15 minutos", desenvolverase a partir das 12.00 horas e ofrecerá ferramentas sinxelas para incorporar o autocuidado á vida cotiá.
Baixo o lema "Mini-rutinas de autocuidado", a proposta pretende demostrar que pequenas accións diarias poden xerar grandes cambios para sentirse mellor tanto por dentro como por fóra. Durante a sesión, as persoas participantes coñecerán recursos prácticos e fáciles de aplicar no día a día para mellorar o seu benestar físico e emocional sen necesidade de dedicarlles moito tempo.
O obradoiro enmárcase nas iniciativas de promoción da saúde e do envellecemento activo que se desenvolven no rural, apostando por achegar actividades formativas e de sensibilización á veciñanza e favorecendo a adquisición de hábitos que contribúan a unha mellor calidade de vida.
A actividade conta coa colaboración da Biblioteca Rural de San Martiño de Pino, o Concello de Cospeito e a asociación AFALU, ademais do apoio da Xunta de Galicia, a través da Consellería de Política Social e Igualdade, e do financiamento dos Fondos Europeos. A organización anima á veciñanza a participar nesta proposta, orientada a fomentar o benestar persoal mediante rutinas sinxelas e accesibles para todas as persoas.