Clausurado o obradoiro de emprego compartido entre Vilalba e Abadín

TerraChaXa
A Consellería de Promoción do Emprego e Igualdade clausurou o obradoiro de emprego Terra Chá no Camiño II, de Vilalba e Abadín.
OBRADOIRO DE EMPREGO VILALBA E ABADIN
OBRADOIRO DE EMPREGO VILALBA E ABADIN
21 jul 2022

A Consellería de Promoción do Emprego e Igualdade clausurou o obradoiro de emprego Terra Chá no Camiño II, que compartiron os concellos de Vilalba e Abadín e no que se formaron 20 alumnos traballadores.

O delegado territorial da Xunta en Lugo, Javier Arias, fixo entrega dos diplomas que acreditan a formación nas distintas especialidades. Así, os oito alumnos que desenvolveron a actividade en Abadín formáronse en Pavimentos e albanelería de urbanización, mentres que en Vilalba distribuíronse seis en Operacións auxiliares en acabados ríxidos e urbanización e outros tantos en Operacións de gravación de datos e documentos.

A Xunta investiu 369.500 euros neste obradoiro dual, que inclúe incentivos á contratación para 15 dos participantes. Deste xeito, rematado o contrato de nove meses de formación e práctica laboral nos respectivos concellos, os seleccionados poderán incorporarse durante un período mínimo de tres meses a xornada completa en empresas locais de sectores relacionados coas especialidades impartidas.

Neste sentido, Arias destacou que os obradoiros son unha medida de mellora da empregabilidade que proporciona os coñecementos necesarios e experiencia laboral en actividades cos boas perspectivas de inserción, ao tempo que realizan obras e servizos de interese para a comunidade.

Así, nesta última edición continuaron coas tarefas de dixitalización do arquivo municipal de Vilalba que xa acometeran obradoiros anteriores, e realizaron obras de humanización da travesía Coronel Pena, no casco urbano. En Abadín executaron a segunda fase da renovación dos pavimentos das beirarrúas na avenida de Galicia.

Arias destacou que “este ano estamos a piques de notificar as concesións dunha nova convocatoria de obradoiros duais que permitirá formar a unhas 1.600 persoas en Galicia con dúas grandes novidades: un incremento do orzamento do 23%, superando así os 42 millóns de euros, e un maior período de formación do alumnado, pasando dos 9 aos 12 meses de duración".